ШУА – ийн Одон орон, геофизикийн хүрээлэн (ООГХ) болон АШУҮИС-ийн харьяа Анагаах ухааны хүрээлэн (АУХ) хоорондын хамтын ажиллагааг эхлүүлэх, эрдэм шинжилгээний хамтарсан уулзалт, семинарыг зохион байгуулах, СБА болон судалгааны багаж тоног төхөөрөмж, хүрээлэн төвүүдийн лабораториудтай танилцах, ажлын туршлага солилцох, залуу эрдэмтэн судлаачдын хамтын ажиллагааг дэмжих зорилгоор “Шинжлэх ухааны өдөрлөг”-ийг 2019 оны 1 дүгээр сарын 24-25 өдрүүдэд зохион байгууллаа.
1 дүгээр сарын 24-ны өдөр Одон орон, геофизикийн хүрээлэнгийн хамт олон АУХ-ийн үйл ажиллагаатай танилцахын зэрэгцээ “Цөм лаборатори”-ийн үйл ажиллагаатай танилцав.
АУХ-ийн эрдэмтэн нарийн бичгийн дарга, доктор Л.Тулгаа хүрээлэнгийнхээ бүтэц, үйл ажиллагааны чиглэл болон судалгаа шинжилгээний ажлуудын талаар товч танилцуулга хийсэн. Түүнчлэн “Дотор судлалын сектороос хэрэгжүүлж буй эрдэм шинжилгээний төслүүдийн танилцуулга, IF-тай олон улсын сэтгүүлд эрдэм шинжилгээний өгүүлэл хэвлүүлэх аргазүй” сэдвээр АУХ-ийн Дотрын эмгэг судлалын секторын эрхлэгч, доктор Б.Батболд, “Эрдэм шинжилгээний төв лабораториос хэрэгжүүлж буй эрдэм шинжилгээний төслүүдийн танилцуулга, үр дүн” сэдвээр эрдэм шинжилгээний төв лабораторийн эрдэм шинжилгээний ажилтан Д.Золзаяа, “Дермалаб гарааны компанийн брэнд бүтээгдэхүүний танилцуулга” сэдвээр тус гарааны компанийн захирал, доктор С.Мөнхбаяр, “Мэдрэл судлалын сектороос хэрэгжүүлж буй эрдэм шинжилгээний төслүүдийн танилцуулга, үр дүн” сэдвээр Мэдрэл судлалын секторын эрдэм шинжилгээний ажилтан О.Гансувд, “Зүрх судасны мэс заслын сектороос хэрэгжүүлж буй эрдэм шинжилгээний төслүүдийн танилцуулга, үр дүн” сэдвээр Зүрх судасны мэс заслын секторын эрдэм шинжилгээний ажилтан Б.Саруулжавхлан нар тус тус илтгэл тавив.
1 дүгээр сарын 25-д, АУХ-ийн хамт олон ООГХ-ийн үйл ажиллагаа, судалгаа шинжилгээний ажлууд болон тэдгээрийн үр дүнгүүдтэй танилцахын зэрэгцээ Астропаркын музейг үзэж сонирхов.
Тус хүрээлэнгийн эрдэмтэн нарийн бичгийн дарга, доктор, дэд профессор Ч.Одонбаатар хүрээлэнгийн танилцуулга хийсний дараа Газар хөдлөл судлалын салбарын э.ш-ний ажилтан М.Долгормаа “Монгол орны газар хөдлөхүй” сэдвээр, Астропарк салбарын э.ш-ний ажилтан Б.Алтан-Очир “Орчлон ертөнцийн үүсэл хөгжил” сэдвээр, Астрофизикийн салбарын э.ш-ний ажилтан Б.Түвшинжаргал “Нарны хэт ягаан цацраг” сэдвээр тус тус илтгэл тавьж АУХ-ийн судлаачдын асуултанд хариулж тай харилцан ярилцлага хийв.
Мөн тус өдөрлөгийн үеэр спортын 4 төрлөөр нөхөрсөг тэмцээнийг зохион байгуулахын зэрэгцээ ООГХ болон АУХ-ийн хамтарсан урлагийн арга хэмжээг зохион байгуулсан.
