Сансар танхим буюу сансрын музей
Энэ танхимд орчлонгийн бүтэц, үүсэл, манай галактик ба гадаад галактикууд, Нар ба нарны аймгийн тухай тайлбар бүхий зурагт самбарууд, Дэлхийн сансар судлалын түүх, ололт амжилт, хүн төрөлхтөн сансрыг хэрхэн эзэмшиж эхэлсэн, сансрын хөлөг, пуужинг хэрхэн зохион бүтээж эхэлсэн зэргийг харуулсан плакат, пуужингийн макет загварууд байхаас гадна Монгол хүн анх сансарт ниссэн түүхэн үйл явдлыг харуулсан үзүүлэн, тэр үеийн баримт материалуудыг тавьсан байна. Мөн Монгол улсын баатар, сансрын нисэгч Ж.Гүррагчаагийн хөлөглөн сансарт хүрсэн “Союз-39” хөлгийн буугч аппарат, бэлтгэл хийж байхдаа өмсөж байсан хувцас хэрэглэл зэргийг байрлуулсан байна.
Нар сар кино танхим
Одон орон геофизикийн судалгааны төвийн эрдэм шинжилгээний ажилтнуудын бэлтгэсэн орчлон ертөнц, од гаригсийн тухай шинжлэх ухааны сонирхолтой цуврал лекц баримтат кино үзүүлэх танхим.
Од эрхэс танхим
Энэ танхимд планетари байрлана. Планетари бол хагас бөмбөрцгөн дээврийн дотор гадаргуу дээр од, гараг, нар, сар, бусад тэнгэрийн эрхсүүдийн дүрсийг тэдгээрийн гэрэлтэлт, байрлал хөдөлгөөнийг тооцон проекцлон гаргадаг төхөөрөмж, проектор юм. Планетари нь дэлхийн аль ч цэгээс өнгөрсөн, одоо, ирээдүй аль ч хугацаанд тэнгэрийн зургийг харах боломж олгодог. Японы эрдэмтэн Сакай Ёшихитогийн бэлэглэсэн “Минолта MS-8” планетарийн тусгай багаж, тоног төхөөрөмжийн тусламжтайгаар одот тэнгэрээр аялан одод ба оддын ордууд, сүүн замтай танилцана. Мөн одот тэнгэрийн хоногийн эргэлт, хөдөлгөөний тухай, дэлхий дээр яагаад өдөр шөнө солигддог тухай, нарны аймгийн бусад гаригууд, сүүлт од, бага гаригуудын тухай мэдлэгийг олж авна.
